Teningakast með Scratch
Ræsum Scratch
Það er hægt að hlaða Scratch niður og keyra sem sér forrit en í þessu verkefni ætlum við að nota veflæga forritunarritilinn á scratch.mit.edu. Þetta eru að mestu leyti jafngild umhverfi en veflæga útgáfan leyfir notandanum að skrá sig inn, leita og nota verkefni sem aðrir hafa deilt, og deila sínum eigin hugarfóstrum.
Þegar þú ert búin(n) að opna veflæga ritilinn skaltu skrá þig inn eða búa til nýjan notanda með því að smella á hlekkina í efra hægra horninu.
Nú erum við tilbúin til að fara að forrita. Við ætlum að byrja á einföldu forriti sem líkir eftir teningakasti og notar breytu til að geyma útkomuna.
Stuttur inngangur að verkfærunum
Ef þú ert kunnug(ur) Scratch viðmótinu geturðu óhrædd(ur) sleppt þessum hluta og farið strax í fyrsta verkefnið.
Með sjálfgefna viðmótinu ætlum við að byrja á að setja saman skipanir, eða forrit, sem stýra appelsínugula kettinum Scratch á hvítu sviði. Við getum breytt útliti kattarins eða bætt við nýjum teikningum, en hér höldum við okkur bara við köttinn í bili.
Skipanirnar eru gefnar með því að púsla saman kubbum sem hver hefur sína virkni. Til að eiga betur með að rata um skipanasettið eru kubbarnir flokkaðir og ber hver flokkur sinn lit. Flokkarnir sem við ætlum að byrja á að nota eru:
- Atburðir
- Atburðakubbarnir eru aðallega notaðir til að grípa „atburði“, eins og músarsmell á græna flaggið, köttinn, slátt á hnapp eða eitthvað því um líkt. Þegar atburður á sér stað er tilsvarandi atburðakubbur ræstur og kubbakeðjan sem hangir neðan í honum keyrð.
- Breytur
- Breytur eru minnishólf sem geta geymt tölur eða texta. Þær eru ákaflega gagnlegar í allri forritun, sér í lagi þar sem unnið er með gögn eins og útkomur úr teningakasti.
- Virkjar
- Virki er safnheiti yfir hvers kyns stærðfræðiaðgerðir. Plúsinn í samlagningu er þannig virki, en virkjar geta verið af ýmsum gerðum. Við munum t.a.m. nota slembnivirkja sem gefur okkur tölu af handahófi.
Teningi kastað
Til að kasta teningi þurfum við að velja okkur atburð sem kastar teningnum og vistar útkomuna með því að:
- velja atburð,
- búa til breytuna,
- velja töluna af handahófi og geyma hana í breytunni.
Hér má sjá einfalt teningakastsforrit sett saman skref fyrir skref:
Þegar breyta er búin til er hægt að stýra gildissviði hennar. Það þýðir að innihald breytunnar getur verið aðgengilegt öllum teikningum, hér er það kötturinn sem við byrjum með á sviðinu, eða aðeins þeirri teikningu sem stefjurnar eru tengdar.
Hér veljum við bara „fyrir allar teikningar“ en það er gott að hafa í huga að einnig er hægt að einskorða breytur við ákveðnar teikningar. Þannig er t.a.m. hægt að búa til breytu með sama nafni, t.d. heilsa, sem á bara við viðkomandi teikningu.
Nöfn breyta geta verið alls kyns, en góð breytunöfn ná jafnvægi á milli lengdar og ítarleika. Það er erfitt að muna fyrir hvað breytur með stutt nöfn, t.d. „a“, „x“ eða „ú“, standa, en of ítarleg nöfn taka óþarflega mikið pláss í viðmótinu og geta verið of nákvæm ef forritarinn vill síðar breyta forritinu.
Veljum því hæfilega ítarlegt nafn og gefum því gildi af handahófi með slembnisvirkjanum:
Nú getur þú strax farið að nota þetta forrit. Ýttu á bilslána, bil-takkann á lyklaborðinu, og þá velur forritið nýtt gildi á breytuna af handahófi.
Prófaðu að breyta hliðarfjölda teningsins og sjáðu hvað gerist.