Rafrásir með perustæðum

Stilltu aflgjafann á hentugt spennugildi.
Perurnar sem notaðar eru í þessum leiðbeiningum eru gerðar fyrir spennuna 4,5 V og strauminn 0,1 A.

Tengdu tvær krókódílaklemmur við sitt hvort skaut aflgjafans, + og −.
Það er gott að hafa þær í ólíkum litum. Hefðin er að hafa rauðan í jákvæða pólnum og svartan í þeim neikvæða.

Tengdu hinn enda krókódílaklemmanna við sitt hvort perutengið.
Nú ætti að kvikna ljós.

Legðu annað perustæði til hliðar við það sem er tengt við rásina.

Tengdu perustæðin saman eins og á myndinni.
Nú ættirðu að fá ljós á báðum perunum.

Tengdu nú fleiri perur við hlið hinna.
Hvernig breytist ljósmagnið eftir því sem þú bætir fleiri perum við? Hvað segir þetta um strauminn sem flæðir um hverja peru? Hvað með strauminn sem rafhlaðan gefur frá sér?

Stilltu upp rafrás með einu perustæði eins og var í fyrsta hlutanum.

Aftengdu aðra krókódílaklemmuna og tengdu við annað perustæði.

Tengdu perustæðin saman með þriðju krókódílaklemmunni. Nú ættirðu að fá ljós.

Tengdu nú fleiri perur í röð.
Hvernig breytist ljósmagnið eftir því sem þú bætir fleiri perum við? Ljósmagnið er í réttu hlutfalli við rafstrauminn. Hvað segir þetta um strauminn sem flæðir um rásina eftir því sem þú bætir fleiri perum við?