Tæknidagur fjölskyldunnar verður haldinn í sjöunda sinn laugardaginn 5. október 2019 í Verkmenntaskóla Austurlands.
Dagurinn er sem fyrr tileinkaður tækni, vísindum, sköpun og þróun á Austurlandi og miðast dagskráin við alla aldurshópa.
Vísindasmiðjan verður á staðnum með fjör og fræði fyrir alla fjölskylduna. Í Vísindasmiðjunni geta gestir á öllum aldri upplifað undraverða eiginleika ljóss, lita og hljóða með tilraunum, leik og óvæntum uppgötvunum. Með lifandi og gagnvirkum vísindum er einnig í boði að teikna listaverk með rólu, leika á syngjandi skál, kynnast furðulegum efnasamböndum með Sprengju-Kötu og kanna sjálfan himingeiminn með Stjörnu-Sævari.
Í boði verða tilraunir, þrautir, tæki og tól, leikir og spennandi vinnusmiðjur fyrir alla aldurshópa;
- viltu búa til þitt eigið vasaljós í lóðunarsmiðju?
- spreyta þig á vindmyllugerð og orkunotkun?
Allt þetta og meira til geta gestir spreytt sig á í farandsmiðjunni.