Kennarasmiðjur

Þessi kennarasmiðja er hugsuð sem kynning á Microbit tölvunni og inngangsverkefnum sem hægt er að vinna með nemendum án mikils tilkostnaðar eða undirbúnings.

Smiðjan er verkleg og Vísindasmiðjan útvegar micro:bit-ana. Mælst er til þess að þátttakendur mæti með fartölvu áþekka því sem nemendur þeirra mundu nota. Ekki er krafist neinnar undirstöðu í forritun.

Vinnusmiðja fyrir náttúrufræði­kennara á mið- eða nglingastigi sem vilja auka skilning sinn á rafmagnsfræði og leikni sína í einföldum rafmagnsfræðiverkefnum sem nýta má í kennslu.

Markmið vinnusmiðjunnar er að þátttakendur rifji upp eða bæti þekkingu sína og skilning á nokkrum fyrirbærum í rafsegulfræði og kynnist einföldum verkefnum sem nýta megi kennslu.

Þessi kennarasmiðja er á formi menntabúða þar sem kennarar fá ítarlega kynningu á undirbúningi, framkvæmd og námsmati nokkurra ólíkra gerða vísindasýninga í skólastarfi. Farið er yfir þær bjargir sem leita má í og hvað þarf að varast í undirbúningi og framkvæmd.

Ljósakassa­­vinnu­­­smiðjan er ætluð kennurum sem vilja kynnast innihaldi ljósakassans, hvernig hægt er að nýta hann í sýnikennslu eða verklegar æfingar fyrir nemendur, og fræðunum sem að baki fyrirbærunum sem tækin sýna.

Vinnismiðjan er verkleg þar sem farið er yfir nokkur verkefni sem hægt er að vinna með nemendum og eðlisfræðina sem liggur að baki þeim.

Þessi vinnusmiðja er ætluð fyrir leiðbeinendur liða í First Lego League keppninni sem Háskóli Íslands stendur að hér á landi.

Keppnin er margþætt og snertir ekki bara á forritun og verkefnalausn heldur, byggir hún einnig á liðsheild, heilbrigðri samkeppni, og rannsóknum og nýsköpun tengdum þema keppninnar.

Micro:bit tölvurnar henta vel til forritunarkennslu og mikið til af kennsluefni. KrakkaRÚV-vefurinn kodinn.is inniheldur mikið af gagnlegu efni en í þessari vinnusmiðju verður farið skrefinu lengra og microbit tölvur tengdar við tæki eins og mótora og skynjara.

Efling á áhuga og skilningi nemenda á náttúrufræði með notkun ljósmyndunar og myndbandstækni

Menntavísindasvið Háskóla Ísland í samstarfi við Vísindasmiðju Háskóla Íslands býður upp á námskeið í notkun ljósmyndunar og myndbandstækni í náttúrufræðikennslu.

Námskeiðið er að mestu verklegt. Unnið verður með þemað „Vorkoman í hverfinu“ en markmiðið er að þátttakendur geti útfært sambærileg verkefni á einfaldan hátt í sinni kennslu. Þátttakendur fara út og safna myndefni sem svo verður unnið úr með mismunandi myndvinnsluaðferðum.

Vinnusmiðja fyrir kennara á framhaldsskólastigi í notkun forritunar til líkanagerðar og mælinga.

Notuð verða forritunarmálin Processing og Python og gagnleg verkfæri í kennslu kynnt til sögunnar. Verkefnin eru bæði eftir forskrift og opin þar sem þátttakendur leysa verkefni án þekktrar lausnar.

Námskeiðið er eins dags námskeið og tekur fyrir nokkur efni til þess að búa til einföld en skemmtileg verkefni með skynjurum, rofum, ljósum og mótorum.

Farið verður yfir grunnhugtök í gerð rafrása; spennu, straum og viðnám, auk hliðtengingar og raðtengingar íhluta. Þessi fimm hugtök eru nægjanleg til að skilja verkefnin sem farið er í og velja hentuga íhluti í ný verkefni.

Þessi kennarasmiðja er hugsuð sem kynning á nokkrum inngangsverkefnum sem hægt er að vinna með nemendum án mikils tilkostnaðar eða undirbúnings. Verkefnin eru:

• Samþætting forritunar og hefðbundinna námsgreina með Scratch
• Tækjaforritun með Scratch á Raspberry Pi tölvum
• Microbit forritun og efnið á Kóðinn.is

Námskeiðið er keyrt í tveimur þriggja klukkutíma hlutum, ýmist á tveimur eftirmiðdögum eða einum degi (Dæmi um dagskrá).

Sphero Sprk+ er lítill þjarkur sem ekur um inni í kúluskel. Honum má stýra með fjarstýringu eða með því að skrifa forrit og senda það yfir á þjarkinn.

Á síðustu árum hafa komið fram margar gerðir þjarka sem henta vel til forritunarkennslu. Hver þeirra hefur ákveðna kosti og galla. Sphero er smár, kvikur og með afar skemmtilega hönnun þar sem þjarkurinn sjálfur ekur um í kúluskelinni eins og hamstur.

BlueBot þjarkarnir bjóða upp á marga skemmtilega kosti við forritunarkennslu í leikskólum og yngri stigum grunnskóla.